Rais wa Zanzibar na Mwenyekiti wa Baraza la Mapinduzi Dkt Hussein Ali Mwinyi amesema Serikali ya Mapinduzi ya Zanzibar itaendelea kuhakikisha elimu inakuwa miongoni mwa vipaumbele vya mwanzo kwa maendeleo ya wananchi na taifa kwa ujumla.
Rais Dkt, Mwinyi ameyasema hayo katika hafla ya uwekaji wa jiwe la msingi katika ujenzi wa Skuli ya Msingi ya Maziwang’ombe Wilaya ya Michewni Mkoa wa Kaskazini Pemba ikiwa ni muendelezo wa shamra shamra za maadhimisho ya Miaka 60 ya Mapinduzi Matukufu ya Zanzibar.
Amesema Serikali itaendelea kujenga skuli na kuimarisha mazingira ya skuli kwa kuzipatia vifaa mbalimbali vya kufundishia na kujifunzia.
Aidha Rais Dkt. Mwinyi amesema Selikali inatarajia kujenga skuli 20 za mfano wa skuli inayojengwa katika eneo la Fuoni Zanzibar na kampuni ya ROK ambayo inatumia teknolojia mpya ya ujenzi.
Sambamba na hilo Mhe. Rais amesema Suala la matumizi ya teknolojia litaendelea kupewa kipaumbele kwa kuziunganisha skuli na mkonga wa taifa ili ziweze kuwasiliana na kutumia rasilimali ziliopo kwa pamoja
Akizungumzia Mabadiliko ya Elimu Rais Dkt. Mwinyi amesema Serikali tayari imeshazindua miradi mitatu yenye malengo mbalimbali ya kuimarisha elimu Zanzibar yakiwemo kuimarisha mafunzo ya amali na kuongeza ujuzi na utalaamu kwa vijana katika soko la ajira hasa katika Uchumi wa Buluu.
Amesema kupitia miradi hiyo Serikali itajenga vyuo vitano Unguja na Pemba ambapo kimoja kitajengwa Wilaya ya Micheweni katika eneo la Tumbe na Ujenzi wa Chuo cha Ubaharia katika eneo la Beit Raas Unguja.
Dkt. Mwinyi amesema kwa kushirikiana na Benki ya Dunia Serikali inalenga kuimarisha teknolojia itakayoimarisha mazingira ya kujifunza, uwezo wa walimu katika kufundisha, uongozi wa elimu katika ngazi zote za elimu sambamba na kuimarisha upatikaji wa vitabu kwa wanafunzi na walimu vitakavyosaidia utekelezaji wa Mtaala mpya.
Serikali imeanza utekelezaji wa mageuzi hayo katika mfumo wa elimu ili kuhakikisha vijana wanapata elimu inayowezesha kukabiliana na changamoto za mazingira yao.
Amesema suala la mageuzi ya Mfumo wa Elimu linahitaji muda mrefu kuona matokeo yake lakini amewapongeza Walimu kwa jitihada wanazozichukua kuleta mabadiliko hayo haraka iwezekanvyo.
Rais Dkt. Mwinyi amesema Matokeo mazuri katika mitihani ya kitaifa ni miongoni mwa mafanikio ya utekelezaji wa Mabadiliko hayo hivyo amewatka Walimu kuendelea kutimiza wajibu waokatika utekelezaji wa mabadiliko ya Elimu Nchini.
Nae Waziri wa Elimu na Mafunzo ya Amali Zanzibar Mhe Lela Mohamed Mussa amesema ujenzi wa ghorofa katika Skuli ya Maziwang'ombe ni Utekelezaji wa Azma ya Muheshimiwa Rais ya kuleta mageuzi katika Elimu.
Amemshukuru Mkandarasi wa Kampuni ya SINIC Construction kwa kanzi nzuri na ya haraka ya Ujenzi wa Skuli hiyo.
Mkuu wa Mkoa wa Kaskazini Pemba Mhe. Salama Mbarouk Khatibu amesema awamu ya nane imekua ni mfano Bora katika Utekelezaji wa Malengo ya Mapinduzi ya Mwaka 1964.
Aidha amesema Serikali ya Mkoa wa Kaskazini Pemba imekua imara katika kusimamia Ujenzi wa Miradi ya Maendeleo.
Akiwasilisha ripoti ya kitaalamu kuhusu ujenzi wa Skuli hiyo Katibu Mkuu Wizara ya Elimu na Mafunzo ya Amali Bw. Khamis Abdullah Said amesema amesema jumla ya Tsh. Bilioni 6.2 zimetumika hadi kukamilika kwa ujenzi wa Skuli hiyo ulioanza mwezi May 2023 hadi mapema January 2024. (https://www.instagram.com/reel/C1rFVVUPvim/)